Kategori: Sajak Sunda | Diterbitkan pada: 25-05-2008 | Tak ada komentar »
Ku Etti RS
Sarébu léngkah muru pangauban
‘na hiji peuting meredong
Sarébu rénghap katunda dina implengan
‘na biwir jungkrang nu bedang
Mangrébu angen-angen nganteng
dina benang-benang peteng
Dina hiji peuting nu jempling
muga béntang-béntang nebarkeun kawening
(tina Gondewa, Taraté)
Kategori: Sajak Sunda | Diterbitkan pada: 25-05-2008 | Tak ada komentar »
Ku Sayudi
Onih bulu taneuh urang dayeuh
keur leutik mongmongan ema
hirupna nyampak di bapa
ceurik ukur ku paménta
teu nyaho di wujud dunya
Geus gedé ténjona jodo
dirangkul lamunan éndah
ngapak ngapung muru jauh
tinggal kalangkang ngayangkang
Kamari Onih patali jangji
ka ponggawa ngabuhaya
dasar Onih sisit kadal
geus nahun cintana gagal
heneg di dada teu suda
Ayeuna Onih rumaja kota
awakna montok cintana hapa
kelet pamélét udagan duda
seuri Onih seuri […]
Kategori: Sajak Sunda | Diterbitkan pada: 25-05-2008 | Tak ada komentar »
Ku Taufik Faturohman
Bulan dicangkalak katineung
bagja cilaka ngadedempés na cukang harepan
(budak lalaki ngatepél béntang ku pakél)
Angin nu ditenung kahariwang
hamo bisa ningtrimkeun kamelang
harepan demi harepan
karahaan
digerihan kacapi beurang
(budak lalaki nyamualkeun bulan)
(tina Puisi Sunda Mutahir, Medal Agung)
Kategori: Sajak Sunda | Diterbitkan pada: 25-05-2008 | Tak ada komentar »
Ku Rachmat M Sas Karana
Mojang lenjang nu hideung santen
diaping srangéngé ti énjing dugi ka sonten
upami wengi dipépéndé bulan ngempur
Jungjunan
mun nepi ka puput umur
kurebkeun kuring
dina pangkonan
(tina Tepung di Bandung, Rahmat Cijulang, 1982)
Kategori: Sajak Sunda | Diterbitkan pada: 25-05-2008 | Tak ada komentar »
Ku Hadi AKS
Hujan di buruan
lain cimata
tapi kakelar nu tinggarendang
na daun-daun pandan
Di dieu aya kénéh angin
nu ngalaong ti tungtung lembur
basa peuting beuki jauh
haté dibawa tilem laun-laun
Geura reureuh ka dieu
kana liliuh peuting
unggal mata nu katideresa
atawa impian nu kalunta-lunta
Hujan tinggal sesana di buruan
tapi aya kénéh kalangkang bulan
jeung langit beresih
dina riak cileuncang
(tina Ombak Halimun, Pamulang)
Kategori: Sajak Sunda | Diterbitkan pada: 25-05-2008 | Tak ada komentar »
Ku Wahyu Wibisana
Iuh-iuh gunung kuring
angin ulin dina embun-embunan
sawaktu-waktu kuring kudu nepungan
duméh hirup halabhab cinta
di maranéhna nya ayana
Aya sababna kuring tibelat
aya sababna kuring pegat
tapi nu ahir lain kaabadian
kakasih dina haté ngawih deui
Iuh-iuh gunung kuring
nyata-nyata tanda-tanda
ngabulungbung jalan hirup
nepi ka nyawa rék surup
ka maranéhna kuring rék balik
ka maranéhna kuring rék pamit
(tina Saratus Sajak Sunda, Geger Sunten, 1992)
Kategori: Sajak Sunda | Diterbitkan pada: 25-05-2008 | Tak ada komentar »
Ku Abdullah Mustapa
Sora nu tinggerendeng
teu weléh sahéng
di leuwi aing
Laut nu tan istirah
teu weléh motah
di leuwi aing
di leuwi aing
sagala teu weléh betah
sagala teu weléh motah
(tina Saratus Sajak Sunda, geger sunten 1992)
Kategori: Sajak Sunda | Diterbitkan pada: 25-05-2008 | Tak ada komentar »
Ku Eddy D Iskandar
Laut gigireun upluk-aplak
gupay-gupay lambak nyuruwuk
neumbag mangsa
Bréh katangén sorangan
ngalungsar di basisir
dipentrang panonpoé haté
bayeungyang mangsa katukang
awak ngulahék
dina keukeupan angin garing
(tina Waruga Garba, Medal Agung)
Kategori: Sajak Sunda | Diterbitkan pada: 25-05-2008 | Tak ada komentar »
Ku Godi Suwarna
Bet gumeter ramo-ramo haté kuring. Ngagupay-gupay
salira. Geus lawas teuing ku lawas, madu anggang ti
amisna. Nya ieu kuring maduna, bet piraku ilang sari
salawasna. Saban rénghap pirang-pirang binih kembang
ditebar salega sukma. Bari disiram kamelang, bising
garing pepetétan. Geus lawas teuing ku lawas. Geuning
salira teu rekah na amparan taman kuring. Duh, tangkal
nu ditilar […]
