Sajak DHIPA GALUH PURBA
Reumis janari mimiti tunggara
Lempay, neundeun asih urut peuting
Léngkah leutik nyacag jukut
haté rangkidut
ibun kaibunan, sumirat teu némbongan
munding begang, kebo hideung ngawuluku,
sawah teu nyawaan
Budak leutik léngkahna teu ajeg
ngadupak sasajén haturaneun
buta hejo
ngajodo jeung kélong wéwé
nyisir ku garu, ngerok janggot ku pacul
pamidangan geus henteu maké bangbarung
Domba geus salin sora, hayam geus béda cacakar
loba mojang remen nganjangkeun tuur
di jalan satapak nu awor jeung sora buta hejo
parawan di sawah diculik,
jajaka di tegalan di sumputkeun kélong wéwé…
teu nyawaan
Léngkah leutik nyacag jukut, haté rangkidut
ibun ka ibunan, sumirat teu némbongan
nénjrag
kalangkang, awong-awongan bari kabekem
Nyi Buyut Déwi Sri…
kuring mapag mawa payung kabuyutan
ngampar samak di galengan
pacul…singkal…Munding panghudangkeun
Léngkah leutik nyacag jukut, haté rangkidut
ibun kaibunan, sumirat teu nembongan
saha nu rék luas nukeurkeun ranggeuyan
saha nu rek luluasan…?
Ranggon
Panyileukan, 2001
Komentar